Xornal Económico

institucional

Leite: SLG e Asaga exixen á Xunta que aplique a lei da cadea alimentaria para frear a caída de granxas

O sector lácteo galego levou este xoves ao Parlamento a problemática dos prezos do leite. O Sindicato Labrego Galego (SLG) e a Asociación Agraria de Galicia (Asaga) coincidiron en sinalar o incumprimento da Lei da cadea alimentaria como unha das principais causas do descenso de explotacións e reclamaron á Xunta medidas concretas para garantir un prezo xusto aos gandeiros.

Por

Fotografía que ilustra la noticia: Leite: SLG e Asaga exixen á Xunta que aplique a lei da cadea alimentaria para frear a caída de granxas
(nosdiario.gal)

Responsables políticos apuntan á Lei da cadea alimentaria e á ausencia de Medio Rural

Durante a quenda de intervencións, os grupos parlamentarios expuxeron as súas posicións. Ariadna Fernández, do BNG, amosou a súa preocupación "por que o debate non saíse do Parlamento" e botou en falta a presenza da Consellería de Medio Rural, "que leva dúas décadas ausente". A deputada nacionalista tamén pediu "mobilizar superficie agraria para o sector" como medida para reforzar a produción local fronte á presión dos grandes operadores.

Pola súa banda, Lara Méndez, do PSdeG, cualificou os prezos como "unha urxencia" e describiu unha situación "con máis leite e menos explotacións leiteiras". O Partido Popular, representado por Miguel Ángel Viso, pediu "máis concreción" ás organizacións agrarias para definir solucións e lembrou que a Lei da cadea alimentaria "é unha competencia estatal", un matiz que deixa entrever as dificultades de aplicación desde a Xunta.

Bello: "O gandeiro galego non quere que negocien por el"

Na segunda comparecencia, o presidente de Asaga, Francisco Bello, foi claro: "Se hai vontade política débese garantir a Lei da cadea alimentaria, unha competencia estatal". Bello subliñou que, aínda que a lei sexa estatal, o seu cumprimento nas explotacións galegas depende da implicación das administracións e da cadea de subministración.

En relación á negociación dos prezos, o presidente de Asaga ofreceu unha lectura directa da realidade do sector: "O gandeiro galego non quere que negocien por el, é individualista, vémolo no pouco éxito que teñen aquí as cooperativas". Unha afirmación que abre o debate sobre a capacidade de negociación das explotacións galegas ante as industrias lácteas, nun contexto no que a concentración do sector transforma as regras do xogo. Tanto SLG como Asaga coincidiron na necesidade de "darlle continuidade ás mesas de negociación" e de dispor de "estudos e análises de custos de produción", como os que se realizan en Euskadi, para que os prezos pagados aos gandeiros reflictan os seus custos reais.