Tecnópole y Cidade da Cultura acogen el XIX Encuentro Ibérico de Parques Científicos y Tecnológicos con 25 parques de España y Portugal

Un encontro que arranca en Tecnópole coa presenza institucional e empresarial

A primeira xornada comezará ás 10.00 horas en Tecnópole coa presenza da directora xeral de Estratexia Industrial e Solo Empresarial da Xunta, Margarita Ardao; o vicepresidente de APTE, Luis Pérez, e o presidente de TecParques, Nuno Augusto. A apertura institucional dá paso a un programa no que a intelixencia artificial será a primeira gran protagonista.

A IA abrirá as sesións cunha mesa redonda moderada pola directora de Innovación do Igape, Rosa Méndez, na que participarán representantes de empresas tecnolóxicas como Orange e a galega Situm Technologies. Ademais, Martín Piqueras, asesor de Gartner, analizará os principais retos asociados ao desenvolvemento e implantación da IA, un dos ámbitos que a Xunta considera estratéxico para a cooperación industrial e tecnolóxica entre Galicia, España e Portugal.

Aeroespacial e uso dual: a eurorrexión como espazo de cooperación

O sector aeronáutico e espacial terá unha presenza destacada a través de AeroGanp, proxecto transfronteirizo entre España e Portugal dirixido a impulsar a investigación e a transferencia de coñecemento na eurorrexión. Na iniciativa participan o Instituto de Investigación en Física, Computación e Ciencia Aeroespacial da Universidade de Vigo, que lidera o proxecto, e diferentes centros tecnolóxicos portugueses.

O encontro permitirá tamén coñecer os programas de aceleración de Galicia e Portugal neste sector. Por parte galega estará presente a Business Factory Aero (BFAero), impulsada pola Xunta para favorecer o desenvolvemento de empresas innovadoras do ámbito aeronáutico. Entre as empresas participantes figura Kreios Space, especializada na fabricación de compoñentes para os sectores aeroespacial e da aviación.

As tecnoloxías de uso dual, inicialmente desenvolvidas para aplicacións civís pero susceptibles de utilización en seguridade, defensa ou ámbitos militares, serán obxecto doutra mesa redonda, conducida pola subdirectora xeral de Estratexia Industrial e Solo Empresarial, Farrah Meghazi. Participarán empresas asentadas en parques de España, Galicia e Portugal, entre elas Egatel, con sede en Tecnópole e especializada no desenvolvemento de equipos de alta tecnoloxía para telecomunicacións, e UARX Space, de Nigrán, dedicada á loxística espacial e ao transporte de pequenos satélites.

O papel das mulleres no sector tecnolóxico e a ciberseguridade como peche

O programa inclúe tamén un espazo para o papel das mulleres no sector tecnolóxico. Nieves Lorenzo, directora da Escola de Enxeñaría Aeronáutica e do Espazo do campus de Ourense, participará como «muller STEM referente» seleccionada por APTE. Desde Portugal intervirá Cláudia Mendes, directora no país de Women in Tech Global, organización centrada na redución da fenda de xénero na industria tecnolóxica.

A segunda xornada, prevista para o mércores na Cidade da Cultura, estará dedicada á ciberseguridade. Responsables de empresas e institucións de España e Portugal analizarán a evolución e os retos da seguridade dixital nunha sesión conducida polo director de Competitividade do Igape, Norberto Penedo. A elección de Santiago para esta sesión non é casual: en Tecnópole está en marcha a construción do Centro de Excelencia en Ciberseguridade de Galicia (CECIGA), unha infraestrutura que se enmarca nas prioridades da Xunta a través da Iniciativa Estratéxica en Seguridade, Defensa e Aeroespazo 2025-2030.

O encontro dá continuidade a máis de dúas décadas de colaboración entre APTE e TecParques e servirá para explorar novas vías de cooperación entre os parques científicos e tecnolóxicos de España e Portugal, así como entre as empresas e institucións vinculadas a estes ecosistemas de innovación. As áreas abordadas —IA, aeroespacial, seguridade e defensa, uso dual e ciberseguridade— están entre as prioridades da Xunta, que ve nestes ámbitos unha oportunidade para reforzar a posición de Galicia no mapa ibérico da innovación.