FRUGA avisa de que la seca deja el agro gallego sin pastos y pide a la Xunta ayudas extraordinarias

A seca esgota os pastos e as reservas forraxeiras

A Federación Rural Galega (FRUGA) alerta do impacto que a seca deste verán está a ter sobre as explotacións agrarias galegas e advirte das dificultades que o sector gandeiro pode afrontar nos vindeiros meses. A organización sinala que a falta de pastos está obrigando xa as explotacións a recorrer ás reservas de forraxe almacenadas para o inverno e que as previsións de rendementos do millo forraxeiro están por baixo dun 50% en moitas zonas.

Fronte a esta situación, unha delegación da Xunta Directiva da FRUGA, encabezada polo seu presidente, Elías Somoza, acompañado de Manuel Dacal e Manel Casal, presentaron ante a Consellería do Medio Rural unha serie de demandas e propostas para facer fronte ás repercusións da seca extrema que as explotacións agrarias galegas sufriron neste verán, con consecuencias tamén nos vindeiros meses.

Risco de redución de cabezas e caída da produción

Segundo a FRUGA, esta situación pode derivar nun outono-inverno especialmente complicado, tamén polas dificultades para adquirir forraxes noutros territorios produtores, como Castela, que estarían igualmente afectados pola seca. A organización considera que algunhas explotacións de leite e carne poderían verse obrigadas a reducir o número de cabezas de gando pola imposibilidade de asumir os custos da alimentación ou pola falta de forraxe.

Isto, advirte, suporía unha caída da produción e da rendibilidade e podería comprometer a viabilidade dalgunhas explotacións. Neste contexto, a FRUGA reclama ao Goberno galego a posta en marcha dunha liña de axudas extraordinarias para as explotacións agrarias, co obxectivo de facer fronte á situación actual e á previsible escaseza de alimento nos próximos meses.

Medidas estruturais: investigación, auga e limitación do eucalipto

A entidade tamén pide medidas estruturais para adaptar as explotacións galegas aos efectos do cambio climático. Entre as propostas figura impulsar a investigación e implantación de especies herbáceas e cultivos forraxeiros máis resistentes á seca, así como reforzar con medios económicos e persoal o Centro de Investigacións Agrarias de Mabegondo.

A FRUGA reclama ademais unha planificación da xestión da auga que priorice o abastecemento da poboación e a produción de alimentos, e aposta por optimizar os plans de rega existentes e crear outros novos cando sexa necesario. Outra das medidas propostas é apoiar economicamente a instalación de infraestruturas nas explotacións que permitan un uso máis eficiente da auga, como sistemas de recuperación e aproveitamento de augas, almacenamento de auga da chuvia ou melloras nas captacións e no transporte.

A organización considera tamén necesario preservar e recuperar superficie agraria e reclama limitar a expansión do eucalipto, ao que atribúe un elevado consumo de auga e efectos negativos sobre a retención hídrica dos solos. Entre as súas propostas figura igualmente a elaboración dun “mapa da auga” que permita coñecer a situación dos recursos hídricos en cada comarca e localidade e, a partir desa información, determinar posibles limitacións ou regulacións sobre cultivos e plantacións forestais nas zonas con maior tensión hídrica.

Finalmente, a FRUGA reclama crear mecanismos estables de interlocución co sector agrario, as organizacións e os profesionais para definir e desenvolver medidas que permitan afrontar tanto os efectos actuais da seca como os retos derivados do cambio climático.