A EGAP programa 216 actividades formativas con 11.000 prazas para o persoal público en 2026

Formación continua en TIC e novidades en intelixencia artificial

O programa anual da EGAP inclúe cursos sobre administración electrónica, intelixencia artificial, robotización, teletraballo e protección de datos. Entre as novidades figura unha formación centrada na aplicación práctica da Lei 2/2025 para persoas comisionadas de IA. No caso do teletraballo, abordaranse as ferramentas específicas e a xestión do tempo.

A oferta complétase coas actividades do Marco galego de competencias dixitais ComDix, orientadas á certificación do uso efectivo, seguro, crítico, creativo e cívico das tecnoloxías nos ámbitos persoal, social, educativo e profesional. Ao longo do ano desenvolveranse ata 47 actividades, con 5.300 prazas destinadas aos distintos colectivos do persoal empregado público.

Tres cursos superiores en áreas TIC

A oferta especializada inclúe tres cursos superiores relacionados coas TIC. O Curso superior en administración electrónica permitirá afondar na implantación desta ferramenta no sector público e no seu impacto na redución de trámites e tempos de espera para a cidadanía. O Curso superior en ciberseguridade ofrecerá unha visión global dos sistemas de información, das súas vulnerabilidades e das ameazas e riscos asociados ao seu uso, desde unha perspectiva xurídica, técnica e práctica. Pola súa parte, o Curso superior en protección de datos abordará os principios básicos de seguridade e as medidas necesarias para implantar nos sistemas de información e reducir os riscos.

Actividades divulgativas e colaboración coa AMTEGA

A programación inclúe tamén actividades divulgativas como os e-martes, deseñados para ofrecer formación práctica e dinámica sobre materias relevantes para a Administración ante os continuos cambios tecnolóxicos e normativos. Estas sesións combinan teoría e práctica para facilitar o manexo das principais aplicacións. Durante o primeiro semestre celebrouse unha xornada de formación práctica dixital sobre notificacións electrónicas, con 50 prazas.

A programación continuará con xornadas dedicadas ao uso de certificados electrónicos, aos sistemas de contratación pública e ao Rexistro electrónico na Xunta de Galicia. Tamén está prevista unha xornada sobre Xestión do coñecemento na era da intelixencia artificial, titulada Retos para as administracións públicas, e unha conferencia sobre Alfabetización dixital dos empregados públicos.

A EGAP e a Axencia para a Modernización Tecnolóxica de Galicia (AMTEGA) colaboran desde 2018 a través de convenios anuais que permiten organizar actividades de formación para o persoal empregado público. O obxectivo é contribuír a unha Administración máis eficaz e eficiente, con mellores servizos á cidadanía, maior transparencia na xestión, máis axilidade na tramitación e unha maior accesibilidade.